Aktuelles
Platt in Basses Blatt Meike Steen-Tensfeldt aus Trappenkamp

Werbung domols un hüüt

von Gerald Henseler

Meike Steen-Tensfeldt

W

er kennt em nich, de Mann mit dat Lich? Clementine hett uns versprooken, dat mit Ariel allens porendeep rein ward. Tilly bodet unse Finger in Pamolive. Hormocenta hölt Marika Rökk un uns faltenlos. Un Stück för Stück keem man sick neeger. Wer ward denn glieks in de Luff gohn, wenn dat HB geven deit.

Dat is Werbung ut letzte Johrdusend. Werbung hüütigendags süht anners ut. De Kinner sind ut Huus und wi mokt uns dat för den Fernseher kommodig  mit Avendbrot, ick glöv, dat is nich blots bi uns de Avendbrottied. Un denn wart uns vertellt un wiest, wat uns allens good deiht:

Dien Fründinnen mokst du neidisch mit Medipharm Wimpernbooster und Antifaltencreme, de dien Huut rosa schimmern utsehn lett. Um nix to vergeeten, mutt Gingkium un Tebonin ut de Affteek her. Wenn di wat wehdeiht, brukst du Doc Schmerzgel, dormit danzt du as dull dörch de Stuuv. Bi Footpilz nimm man een Pilztinktur von Loceryl ünner de rode Lack. Denn brukst du blots noch Dulcosoft mit Stohlweekmaker, wogegen segg ick hier nich.

Wenn dat nich klappt, denn noch mol foftig Drüpen Laxoberal achterno, avers blots nich, wenn du noch op dien niege Viproshaper stiegen wullt. As Fruu brukst du dat schmucke Armband vun Amorelie, um to kieken, wann du fruchtbor büst.

Will dien Mann noch een beten mit die ficheleeren, hölpt di Vagisan för een goodet Geföhl. Um dornoh good intosloopen un för een erholsome Sloop is dat good, Neurexan in´t Huus to hebben. Dat is meist jümmers twischen Clock 6 un Clock 8 jedeen Avend in´t Fernsehen.

Dor lov ick mi doch de Werbung vun domols, de wär jümmers stubenrein. Oh, vergeeten heff ick noch Tena Lady mit de Supersuugkern. Heff ick mien Tebonin doch nich innohm???

Diesen Beitrag teilen:

Zurück